2Ti 1 | GbrGAW | STEP | Wasika ye kwo gmi n Bulus akun nu, Yesu Kristi waʼazi zhin yi, n Shekwoyi wa tnu n woi wa gna azanugbai n na anyikwozai n na aba vinya wye-wyeyi nyalo-nyalo nya ɓeda, nwa zhin kwo alkawali dna n gaiciya ga n Yesu Kristi nyi.

2 Timothy 1

1 Wasika ye kwo gmi n Bulus akun nu, Yesu Kristi waʼazi zhin yi, n Shekwoyi wa tnu n woi wa gna azanugbai n na anyikwozai n na aba vinya wye-wyeyi nyalo-nyalo nya ɓeda, nwa zhin kwo alkawali dna n gaiciya ga n Yesu Kristi nyi.

2 Kwoi lo Timatawus aba omi ɓi ye-ye yi. Shekwoyi Dada, Kristi Yesu eyi Dagayi wo gaho owo alheri, sun-sungye n bugba fuyi.

Bulus ye ye n Timatawus aba

3 Mi zhin Shekwoyi godiya ntu ho ɓo, Timatawus nsukwoyi mi gyi emi Shekwoyi wye, nge wo tu ho anabarka n mwa, wonu zhin emi adada Shekwoyi, omi Shekwoyi nu n woi ce. Omi ɓomwi n mi asese vinya okwonu ma zhin ɓo n kwo dawo.

4 Awo mi pwa ma gye ho njesun, aɓei dami n mwa, gama mi paho awyenyi ɓe lo, esa n yi ɓei fa aje nyi.

5 Mi kpe lo shi ho kpema Dagayi n sun, shi oho ya Afniki n oho nyikwo-wyi yi Lois ɓei zhin, mi tabata lo ho ye kpemawo lo, shi ho ɓei kpema wo nsapai.

6 Miye ma paho ha hohin yi, dna n ho wyepa n na akalai n ho n cei lo, tunyi ewyi n mi ɓei tuho bwa n tukwo, ma tuho anabarka nyi. 7 Gama Zafun Gyi-gyi-yi, Shekwoyi cauta, to ncei pma lo ha wo aza dnan, ama ha ce, ha bwa kala, ha ye ɓa, ha dagma n ho asese n ɓai. 8 Ndei ha zhin apma n ikoyei n kwo dna n ho nyi, hota wo aza dnan, n Dagayi ɓeda gnayi n, kwo ɓai kpe ge mi zhin ho nugundo nu, koda-yake mi dnalo n kurkuku ntu n Kristi eye ɓo. Ho ɓa gni n shiri yi zhin-ha sin wahala n miyi ntu n Dagayi-ɓo, gama woɓa gaho kala dna n na azhingye.

9 Owonu na gni yi, wa kni yi, n tu n wo tnu-tnu gyi-gyi-yi ɓo, to ge yi kunce lo nun, ama ntuge owo shiri nu tunyi kafin asa anyi, n na bai wa wuyi owo alheri n ye-yeyi dna n Kristi. 10 Nsaiye wo ku wuyi pei-pei, sanu eyi gniyi Yesu Kristi wa ɓe n cei, n wa bma efi iko ya wa wuyi wye-wyeyi nyalo-nyalo nya zokwo, dna n gaiciya ga nyi. 11 Shekwoyi la mi kni ma zhin wo waʼazi zhin yi, ma zhin abyedo waʼazi mi-i wu ɓa.

12 Cenu zhin mi-i sin wahala dna n ya n kurkuku vinyikwoi ta wo mi lo n tu cen. Gama mi kpe ezaye lo n mi kpema wo, mi-i kpe lo nge wo ɓa mi wa gu enya n mi la gawo har ewyi n wo ɓa jeze ɓe n cei.

13 La gaiciya zokwo shi cewo, n mi ɓei wu ho nyi, tun baga gaiciya ga n ye-yei n Kristi bei ga ho nyi. 14 Mi ye ha gu kpezhin, cauta dnagmayi n Shekwoyi wa gaho nyi, n ho ɓei gwo n Zafun Gyi-gyi-yi aba n wo dna n ho mi nyi.

15 Shi ho kpelo, a Yesu-viyi vinya n ɓa kun n Asiya, ɓala busi ɓa ku mi ya, har Fimallus n Harmojanis yi. 16 Dagayi wo tu Onisifurus anabarka nwo puwa yi vinya, gama wo zhin mi ziyara woi gami bugba kala. Owo ziyara gami kala n gye ese manayi, to wa wo vinyikwo ge mi dna n kurkuku n. 17 Ɓehin-hin esa n wo ɓei ɓe Roma wa zan mi shin la ɓa, wa kpe aba n mi dna, wa gye mi wye. 18 Dagayi wo tuwo anabarka ewyi n Kristi ɓei jeze ɓe n cei. Ho gna kpelo shi wo ɓei bmami zhin n Afisus.